Tíðindi

VIDEO - Janus Knudsen: Eg síggi svart uppá hetta

Ein møguleiki er, at mynduleikarnir keypa loyvini - so eigararnir kunna sleppa burturúr yrkinum á ein virðiligan hátt.

Felagið Trolbátar sær onga framtíð í vinnuni, við teimum skerjingunum, sum nú eru settar í verk.

HYGG AT VIDEO-samrøðuni við Janus Knudsen, næstformann í felagnum Trolbátar HER  Neyvan lív lagað | Kringvarp Føroya (kvf.fo)

Umboðið hjá Trolbátum var einasta umboðið, ið ikki tók undir við skerjingunum í Umsitingarætlanini. 

Við Umsitingarætlanini, ið var gjørd fyri góðum trimum árum síðani, eru bátarnir í bólki 4T - smærri trolbátar - skerdir tríggjar ferðir við fimm prosentum og nú við 20 prosentum. Tilsamans 35 prosent.

 

Fund við Dennis Holm

Felagið Trolbátar hevur sent hoyringssvar til landsstýrismannin í fiskivinnumálum, Dennis Holm, har greitt verður frá álvarsomu støðuni. 

Í skrivinum stendur m.a. at:

"Bátaeigarnir í hesum bólki síggja sær ikki møguleikar at yvirliva í hesum vinnugeiranum sum útlitini eru. Um friðingarnar gerast verðuleiki, síggja vit ikki aðrar møguleikar enn at koma í eina tilgongd saman við landstýrinum at keypa loyvini inn fyri eina upphædd so núverandi eigarnir kunna sleppa burturúr yrkinum á ein virðiligan hátt."

Fundur verður við landsstýrismannin mikudagin í næstu viku.

Landsstýrismaður vil ikki gera nakra viðmerking til málið, fyrr enn hann hevur havt fund við felagið.