Fiskivinnu- og samferðslumálaráðið hevur lýst kunngerð um broytingar í makrelkunngerðini.

Í kunngerðini eru tvær høvuðsbroytingar.

Onnur er, at kvotutølini verða dagførd, nú endaliga føroyska makrelkvotan í 2024 upp á 98.708 tons er ásett. Kvotutølini hava higartil verið fyribils.

Hin broytingin eru ásetingar um at skipa atgongdina hjá føroyskum skipum at fiska makrel í bretskum sjógvi og norskum sjógvi í 2024.

Avtalað er við Bretland og Noreg, at vit kunnu fiska ein part av okkara makrelkvotu inni hjá teimum.

Eftir avtaluni við Noreg kunnu í mesta lagi 12 føroysk skip royna eftir makreli í norskum sjógvi í senn.

Tí skulu skip, sum ætlað sær í norskan sjógv at fiska makrel, í seinasta lagi 31. juli 2024, kl. 12.00 søkja Vørn um loyvi. Eru fleiri enn 12  skip, sum søkja, verður lutakast millum innkomnu umsóknirnar um raðfylgjuna at sleppa í norskan sjógv. 

Kunngerðin sæst á www.kunngerdaportalur.fo.