Gagnað bæði alivinnuni og fiskivinnuni, um tað almenna tók stig til at halda kópastovninum niðri

Alifyritøkurnar sleppa ikki at skjóta kóp

Alifyritøkurnar sleppa ikki at skjóta kóp, men landsstýrið átti at heimilað øðrum at gjørt tað, tí tað hevði gagnað ikki bara alivinnuni, men eisini fiskivinnuni.

Tað sigur Regin Jacobsen, stjóri í Bakkafrosti.

Løgtingið samtykti í 2020 grein 18b í alilógini, sum sigur, at "tað er bannað einum og hvørjum tilætlað at avlíva havsúgdjór í sambandi við alivirksemi."

USA herðir krøvini

Orsøkin til broytingina var, at amerikanskir myndugleikar fóru at seta strangari krøv til londini, sum útflyta fiskavørur til USA. Og tað hevði sær, at til dømis laksaaling skuldi ikki raka havsúgdjór sum kóp.

Karlot Hergeirsson, løgtingsmaður, hevur sett Høgna Hoydal, landsstýrismanni, ein grein 52a fyrispurning um felli í alivinnuni orsakað av kópi.

Regin Jacobsen heldur, at tað hevði gagnað bæði alivinnuni og fiskivinnuni, um tað almenna tók stig til at halda kópastovninum niðri.

Hoyr innslag í útvarpstíðindunum: Bakkafrost: Kópur er til ampa fyri bæði alivinnu og fiskivinnu | Kringvarp Føroya