Virgar Viberg, sum er ættaður av Nesi, var bert 13 ára gamal, tá hann fór sín fyrsta túr til skips, og hetta var á sild við Morning Star.

Hann er framvegis sjómaður. Virgar siglir sum kokkur við ísfiskatrolaranum, Safir, sum JFK í Klaksvík eigur.

Virgar Viberg hevði siglt sum skipari og stýrimaður, men nú seinnu árini hevur hann mest siglt sum kokkur.

- Hetta er tað einasta, eg kann brúkast til nú, sigur hann brosandi. Virgar loysir tó av á øðrum postum umborð, onkuntíð sum stýrimaður.

Hann hevur eisini siglt sum maskinmaður. Hann hevur roynt tað mesta av tí, sum kann roynast á sjónum - og longri enn teir allar flestu.

- Eg byrjaði á sildaveiði við gørnum, men í nógv ár havi eg siglt við trolarum. Eg havi eisini siglt fleiri ár við línuskipum, sigur hann.

Eitt skifti miðskeiðis í nítiárunum sigldi hann við donskum trolbáti í nøkur ár, og hetta var um ta tíðina, tá føroyskir trolbátar fiskaðu í Eystursjónum.

Virgar Viberg sigur, at mongu árini á sjónum merkjast á kroppinum. Heilsan hevur verið góð, men knøini eru ikki, sum tey vóru.

- Eg havi siglt við Safir í eini sjey ár, og hvussu long tíðin umborð verður aftrat, veit eg ikki. Eg taki ein túr í senn, sigur hann brosandi, tá vit hittu hann í dag.

Brot út grein, hjá Vilmund Jacobsen.