Themis fiskar bæði uppisjóvarfisk og botnfisk

Fyrr í vikuni lá danski trolarin Themis úr Skagen og landaði makrel til Pelagos í Fuglafirði. Skipið er fimm ára gamalt og hetta var triðju ferð tað landar í Føroyum. Tað er 63 metrar langt, 12,9 metrar breitt og lastar 1450 tons. Motorurin er ein 3000kw. MAK.

-Vit fiska makrel, sild, hvítingsbróður og brisling. Vit royna tí bæði eftir uppisjóvarfiski og eftir botnfiski. Tá vit royna eftir botnfiski, royna vit sum oftast við tveimum trolum, við lítlum grunnum undir. Vit royna bara við troli, tí skipið er ikki rigga til nót.

Tað sigur skiparin Erik Abrahamson.

-Hetta er eitt lítið skip í mun til teir stóru nýggju pelagisku trolararnar. Vit eru seks mans við og tvær manningar hoyra til skipið. Gongdin hevur verið í lagið, so vit eru nøgdir, sigur Erik.

Sjómanstrúboðarin vitjaði umborð og fekk eitt prát við mennirnar. Hann hevði eisini eitt Guds orð, bøn og las signingina. Teir vóru eisini heilsaðir við: “Góðan túr og Jesus fylgi tykkum”!

Teimum og sjófólkinum annars verður ynskt Guds signing og varðveitslu.