Yvirlitstrolingar vórðu gjørdar á Landgrunninum í august.

Úrslitini av kanningunum vísa eina øking í nøgd av toski í mun til síðstu fimm árini, men nøgdin er tó enn væl undir miðal.

Nøgdin av hýsu er væl yvir miðal og ein tann størsta í tíðarskeiðnum, sum kanningarnar fevna um (1996-2024).

Umleið tað sama varð fingið av upsa og longu, sum tey síðstu árini, og tað er nakað undir miðal.

Sum í vár, vórðu fleiri kalvaspraggur fingnar á túrinum, og eru tað nógv ár síðani, at tað er komið fyri á hesum kanningunum.

Magakanningarnar vístu, at toskur og hýsa ótu mest av nebbasild norðan- og vestanfyri. Eystan- og sunnafyri var høvuðsføðin hvítingsbróðir og svartkjaftur. Toskur og hýsa vóru væl í holdum.

Toskur, hýsa og upsi verða stovnsmett seinni í ár í samstarvi við altjóða havrannsóknarstovnin ICES, og verða hesi úrslit almannakunngjørd 29. november 2024.

Túrfrágreiðingin kann lesast her.