Hanus selir og keypir 16 makrelkvotur

Óttin fyri at missa makrelkvotur fær Hanus Hansen at taka óvanliga stigið at selja allar makrelkvoturnar, sum eru útlutaðar heimaflotanum, til onnur skip í JFK-samtakinum.

Tað skrivar kvf.fo.

Loyvini at fiska makrel, sum undanfarnu landsstýri ár eftir ár hava býtt út til at kalla allar skipabólkar, verða nú miðsavnað aftur.

Higartil í ár eru 18 makrelloyvi endaliga avhendað, í størstan mun til uppsjóvarskip.

Átta partrolarar í bólki-2 og sjey línuskip í bólki-3 hava endaliga avhendað sínar makrelkvotur. Harumframt hevur eitt rækjuskip endaliga avhendað sína makrelkvotu.

Síðsta, endaliga avhendingin av makrelkvotu í ár er frá Delta Seafood til Vesturvarða og síðani víðari til Norðborg. Henda sølan telur tí tvær ferðir í yvirlitinum hjá Vørn.

Tað er í høvuðsheitum í JFK-samtakinum, sum virkar í flest øllum skipabólkum, at endaligu avhendingarnar av makrelkvotum eru farnar fram.

Hanus Hansen, stjóri, hevur valt at endaliga avhenda - tað vil siga selja - heili 16 makrelloyvi hjá samtakinum. Talan er um átta loyvi í bólki-2, sum hoyra til trolararnar Polarhav, Stjørnan, Jaspis, Ametyst, Safir, Smaragd, Fuglberg og Skoraberg. Eisini hava línuskipini í JFK-samtakinum - Núpur, Pison, Polarstjørnan, Kvikk, Jákup B, Klakkur og Borðoyarnes - øll endaliga avhendað sínar makrelkvotur. Tað sama er makrelkvotan hjá rækjutrolaranum Arctic Viking, sum eisini er partur av JFK-samtakinum.

Allar 16 makrelkvoturnar eru endaliga avhendaðar til onnur skip í reiðarínum. Nakrar kvotur eru fluttar yvir á uppsjóvarskipini Borgaran og Norðing, aðrar yvir á trolaran Gadus, sum síðani hevur latið makrelkvoturnar víðari sum árskvotur yvir á Borgaran. Talan er um tilsamans 3321 tons av makrelkvotu.

Í Framherja-samtakinum eru makrelkvoturnar hjá línuskipunum fluttar yvir á uppsjóvarskipið Fagraberg - tó bara fyri eitt ár. Og makrelkvoturnar hjá Hvalbiar-trolarunum Steintór og Hamranes eru fluttar yvir á uppsjóvarskipið Arctic Voyager, sum P/F Jókin eigur og eisini hevur heimstað í Hvalba.

Sambært yvirlitinum hjá Vørn eru tilsamans 4058 tons av makrelkvotu endaliga avhendað, higartil í ár. Harumframt eru 4736 tons av makrelkvotu avhendað, men bara fyri eitt ár.

Samanlagt er talan um 9800 tons av makrelkvotu, sum er flutt millum skip - yvir á uppsjóvarskip - higartil í ár. Tað eru umleið 70 prosent av tí, sum fyrr í ár varð útlutað til trolarar í bólki-2, línuskip í bólki-3 og rækjuskip.