Fyri nøkrum vikum síðan funnu vit tilvildarliga útav, at eitt putlispæl er framleitt av skonnartini Bellu, sum vit fyri kortum fingu eina kopi av málninginum av. Hetta putlispæl er eitt í eini røð av putlispølum av skonnartum, sum “Irma” hevur framleitt í 1970’unum. Men einki bendir á, at “Irma” visti nakað um syrgiligu lagnuna hjá hesi skonnartini. Heldig sum vit vóru, funnu vit eitt vælhildið eintak av Bellu á eini endurnýtsluheimasíðu í Danmark.

Tað skrivar Tvøroyrar Skjalasavn á facebook-vanga sínum.

Skonnartin Bella varð átt av Hvítanes-felaginum á Tvøroyri, men gekk burtur í 1882 við mann og mús, 20 mans. Hesin missur hevði stóra ávirkan á felagið og fólkið her um leiðir í teirri tíðini.

Málningurin er málaður í 1881 av Jørgen Dahl, eitt ár áðrenn óhappið.

Vit eru errin av at eiga málning av hesi søguligu skonnart, og tað, at vit nú kunnu byggja hana í putlibrikkum, er nakað heilt serstakt, og eisini stuttligt.