Nú eru 655 tons eftir av toskakvotuni á Flemish Kap í ár.

Kvotan er 2.617 tons. Og 1.962 tons eru fiskað, sigur Vørn.

Einki føroyskt skip er á Flemish Kap í løtuni. Klakkur, sum var á Flemish Kap, er farin at sigla heim.

Frystilínuskipini hava nú eginkvotur, so talan er ikki longur um at skunda sær at fiska, áðrenn felagskvotan, sum var, er uppi.

Størri kvota í ár

Kvotan er størri í ár enn hon var í fjør. Í fjør var toskakvotan 1.363 tons.

Limalondini í NAFO vóru samd um at loyva nógv størri heildarveiðu í ár.

Mest loyvda veiðan fór úr 6.000 tonsum í fjør upp í 11.700 tons í ár.

Føroyar eiga 22,35 prosent av heildarkvotuni. Tí vaks føroyska kvotan góð 92 prosent.

Útlitini góð

Á ársfundinum hjá NAFO, sum umsitir fiskastovnarnar á Flemish Kap, í fjør staðfestu limalondini, at útlitini fyri toskastovnin eru góð í ár og næstu ár. 

Umframt 2.617 tons av toski sleppa føroysk skip at fiska 193 tons av svartkalva og 69 tons av kongafiski á Flemish Kap í ár.

Rækjustovnarnir á Flemish Kap og Grand Bank eru framvegis illa fyri.

Tí verður heldur ikki loyvt at fiska rækju har í ár. 

Myndin er tilvildarlig