Fiskivinnuumsitingin er alt ov veik

Axel Hansen mælir í hesi grein vegna Fiskimannafelagið til, at umsitingin í Fiskimálaráðnum beinanvegin verður styrkt, um hon skal verða før fyri at umsita ein nýggja fiskivinnulóggávu.


Fiskimannafelagið hevur víst á, at fyriliggjandi “Uppskot til løgtingslóg um fyrisiting av sjófeingi” landsstýrissins vil gera tað nógv meira kompliserað og tvørligt at umsita fiskivinnuna. Her verður serliga hugsað um ásetingarnar um uppboðssølu, og at skipanin við veiðiloyvi verður strikað.

Hetta halda vit er serstakliga vandamikið við teimum royndum, vit hava av eini sera veikari umsiting í Fiskimálaráðnum.

Her kann verða víst á vánaliga frágingin lógaruppskot og eina røð av óhepnum avgerðum og umsitingarligum feilum. Feskasta dømið eru skeivleikarnir við flyting av veiðiloyvum, og at Fiskimálaráðið beinleiðis váttar, at man ger sær ikki far um fráboðanir frá undirliggjandi stovni, hóast Fiskimálaráðið bað um at verða kunnað, áðrenn møguligar umsóknir um flyting av veiðiloyvi vórðu avgreiddar.

Fiskimannafelagið vil tí staðiliga mæla til, at umsitingin í Fiskimálaráðnum beinanvegin verður styrkt og skipað øðrvísi fyri at tryggja, at hetta fyri Føroyar so týdningarmikla øki verður væl umsitið, og at politiskar ætlanir á økinum kunnu verða framdar á einum tryggum grundarlagi og ikki koma avvarðandi landsstýrismanni í óføri og óneyðugt politiskt rumbul.

Axel Hansen
nevndarlimur í Føroya Fiskimannafelag

Føroya Fiskimannafelag

Endamál felagsins er at fáa fiskimenn og sjófólk at standa saman í felagsskapi til at bøta um kor síni og at starvast fyri øllum, ið kann vera fiskivinnu og sjófólki til frama.

Upplatingartíðir: Mánadag til fríggjadag 8 - 15.

Bryggjubakki 14-17. Telefon 356 000.

E-postur: info@fiskimannafelag.fo

Títt virkna fakfelag

Facebook 

Nýggjastu myndirnar á Flickr